လှိုင်သာယာမြို့နယ်ရှိ မြေကွက်လပ်များကို E-Lite ကုမ္ပဏီက ဖုန်းတာဝါတိုင်များထောင်ရန် ငှားရမ်းလျက်ရှိ

ဆက်သွယ်ရေးကဏ္ဍ လွယ်ကူစေရန်နှင့် တန်ဖိုးနည်းဖုန်းများ အမြန်ပေါ်ထွက်လာစေရန် ရည်ညွှန်း၍ E-Lite ကုမ္ပဏီက ရန်ကုန်တိုင်းဒေသကြီး၊ လှိုင်သာယာမြို့နယ်၌ ဖုန်းတာဝါတိုင်များစိုက်ထူရန် မြေကွက်များလိုက်လံ ငှားရမ်း လျက်ရှိကြောင်းကို ၂၅-၉-၂၀၁၂ ရက်က E-Lite ဖုန်းတာဝါတိုင်စိုက်ထူနေသော တာဝန်ရှိသူတစ်ဦးက ပြော ကြားသည်။ ယင်းသို့ပြောကြားရာတွင် ''ကျွန်တော်တို့ အခုစိုက်ထူနေတဲ့ ဖုန်းတာဝါတိုင်ကတော့ အမှတ် ၁၂ ရပ်ကွက် ပေါ်ဆန်းမွှေး(၁)လမ်းမှာပါ။ လှိုင်သာယာမြို့နယ်ရဲ့ ပထမဆုံး စိုက်ထူတဲ့ ဖုန်းတာဝါတိုင်ပေါ့။ ဒီမြို့နယ်မှာတော့ စုစုပေါင်း ဘယ်နှတိုင်ထောင်မလဲ မသိဘူး။ မြေကွက်တွေလည်း လိုက်ငှားနေတုန်းပါ။ တစ်မြို့နယ် ကိုတော့ ငါးတိုင်အနည်းဆုံးထောင်တယ်။ နောက်ဆိုအခြေခံ လူတန်းစားတွေပါ ဖုန်းကိုင် နိုင်တော့မယ်။ တန်ဖိုး နည်းဖုန်းတွေ အများကြီး ထွက်ပေါ်လာတော့မှာပါ။ ဒီတော့ဖုန်းလိုင်းတွေ မကျပ်ဖို့အတွက် တာဝါတိုင်တွေက လိုအပ်လာပြီ။ ဒါကိုအဓိက ရည်ရွယ်ပြီးတော့ ကျွန်တော်တို့ E-Lite ကုမ္ပဏီက အခုလိုတာဝါတိုင်တွေ စိုက်ထူ တာဖြစ်ပါတယ်'' ဟုပြောကြားသည်။ ဖုန်းတာဝါတိုင်တစ်တိုင် စိုက်ထူလျှင် ပျမ်းမျှ၁၀ရက်ခန့် ကြာမြင့်ကြောင်း၊ ယခု စိုက်ထူသော တာဝါတိုင်မှာ ပြီးစီးလုပြီဖြစ်နေကြောင်းနှင့် လှိုင်သာယာမြို့ နယ်ပြီးလျှင် အခြားမြို့ နယ်များတွင်ပါ စိုက်ထူသွားရန် အစီအစဉ်ရှိကြောင်း သိရသည်။

Posted in: ပြည်တွင်းစီးပွါးရေးသတင်း